तहसीलदार अतुल पाटोळे यांची विभागीय चौकशी करा

तासगाव (ता.तासगाव) तहसीलदार अतुल पाटोळे यांच्या कार्यकाळातील महसुली प्रकरणे व निर्णयप्रक्रियेची सखोल चौकशी करावी.महसुली केसेसमध्ये मॅनेज निकाल दिल्याने अतुल पाटोळे यांची विभागीय चौकशी प्रस्तावित करुन तात्काळ निलंबन करावे.अशी मागणी राष्ट्रीय दलित पँथर सेनेचे महाराष्ट्र प्रदेशाध्यक्ष प्रशांत केदार यांनी पुणे विभागीय आयुक्त यांच्याकडे निवेदनाद्वारे केली आहे.
तासगाव तहसील कार्यालयात चालणाऱ्या महसुली प्रकरणांमधील निर्णयप्रक्रिया,प्रकरणांची सुनावणी, संबंधित कागदपत्रांची पडताळणी तसेच वरिष्ठ महसुली अधिकाऱ्यांच्या आदेशांचे पालन न करता उल्लंघन करण्यात आले आहे.प्रकरणाच्या निर्णयप्रक्रियेत मोठी अनियमितता आढळून येत आहे.तहसीलदार यांनी अनेक महसुली प्रकरणांमध्ये नियमबाह्य आदेश पारित केलेत.प्रांताधिकारी यांचे आदेशाने फेर चौकशी सुनावणीमध्ये आर्थिक तडजोडी करून महसुली कायद्याचे उल्लंघन केले आहे.काही प्रकरणात प्रांताधिकारी यांच्या निर्णयालाच केराची टोपली दाखविण्यात आली आहे. तेंव्हा तहसीलदारकडील महसुली न्याय प्रकरणांमध्ये पारित आदेश,प्रकरणनिहाय अभिलेख आधारित तपासणी करावी..
महसुली प्रकरणांच्या निकाल प्रक्रियेत नियमबाह्य हस्तक्षेप,प्रक्रियात्मक त्रुटी आहेत.तसेच पदाचा गैरवापर करण्यात आला आहे.तेंव्हा महसुली केसेसमध्ये मॅनेज निकालाची जबाबदारी तहसीलदार यांच्यावर पूर्णतः निश्चित करण्यात यावी.संबंधित प्रकरणांची स्वतंत्रपणे चौकशी करून वस्तुस्थिती स्पष्ट करावी.तहसीलदार पाटोळे यांनी संविधानिक पदाचा गैरवापर केला आहे.तेंव्हा त्यांच्यावरील आरोपांचे गांभीर्य तसेच उपलब्ध अभिलेख आणि लागू सेवा नियम विचारात घेऊन चौकशी दरम्यान निलंबन करणे गरजेचे आहे.याबाबत तात्काळ सक्षम अधिकारी प्राधिकाऱ्याने निर्णय घेत निलंबन कारवाई आदेश पारित करावेत.
तहसीलदार पाटोळे यांच्या मनमानी व भ्रष्ट कारभारामुळे तहसीलदार महसुली न्यायप्रक्रियेवरील नागरिकांच्या विश्वास तडा गेला आहे.प्रकरणांचा निष्पक्ष निपटारा व्हावा आणि महसुल प्रशासनात पारदर्शकता निर्माण व्हावी यासाठी विभागीय आयुक्तांनी तक्रारीची गांभीर्याने दखल घेऊन चौकशी आदेश पारित करावेत. अशी मागणी प्रदेशाध्यक्ष प्रशांत केदार यांनी निवेदनात केली आहे.निवेदनावर ऋषिकेश गुजले,यश शिरतोडे,संजय देवकुळे,सागर कोळी,अजित कांबळे,आदींच्या स्वाक्षऱ्या आहेत.