नशेसाठी पैसे न दिल्याने ४५ वर्षीय व्यक्तीवर धारदार शस्त्राने हल्ला

विशेष प्रतिनिधी
जळगाव शहरालगतच्या खेडी गावाजवळ पैशांच्या वादातून एका ४५ वर्षीय व्यक्तीवर धारदार शस्त्राने हल्ला केल्याची घटना शुक्रवारी, २३ ऑक्टोबर रोजी सकाळी साडेनऊ वाजेच्या सुमारास घडली. नशा करण्यासाठी पैसे देण्यास नकार दिल्याच्या रागातून तीन ते चार जणांनी किशोर मधुकर बाविस्कर यांच्यावर हल्ला केल्याचा आरोप आहे. या घटनेत ते गंभीर जखमी झाले असून, त्यांच्यावर शासकीय वैद्यकीय महाविद्यालय व रुग्णालयात उपचार सुरू आहेत.

पैशांच्या मागणीवरून वाद

किशोर मधुकर बाविस्कर हे खेडी येथील शिवनगर परिसरात वास्तव्यास असून, भंगार विक्री करून कुटुंबाचा उदरनिर्वाह करतात. मिळालेल्या माहितीनुसार, गुरुवारी, २२ ऑक्टोबर रोजी सायंकाळी संशयित आनंद पाटील, गौरव पाटील, सनी (पूर्ण नाव समजू शकलेले नाही) आणि अन्य एका व्यक्तीने त्यांच्याकडे पैशांची मागणी केली होती. मात्र, बाविस्कर यांनी पैसे देण्यास नकार दिल्याने त्यांच्यात वाद झाल्याचे सांगण्यात येते. याच वादातून रात्री उशिरा त्यांच्यावर हल्ल्याचा प्रयत्न झाल्याचीही माहिती समोर आली आहे.

दुसऱ्या दिवशी पुन्हा वाद; धारदार शस्त्राने वार

शुक्रवारी सकाळी संशयितांनी पुन्हा बाविस्कर यांच्याकडे पैशांची मागणी केल्याचे सांगण्यात येते. त्यांनी यावेळीही पैसे देण्यास नकार दिल्यानंतर वादाला पुन्हा तोंड फुटले. त्यानंतर संशयितांनी त्यांच्यावर धारदार शस्त्राने हल्ला केल्याचा आरोप आहे. या हल्ल्यात त्यांच्या कमरेवर, पाठीवर आणि हातावर वार झाल्याने ते गंभीर जखमी झाले.

रुग्णालयात उपचार सुरू; पोलिस तपासाकडे लक्ष

घटनेची माहिती मिळताच नातेवाईक आणि मित्रपरिवाराने जखमी बाविस्कर यांना तातडीने शासकीय वैद्यकीय महाविद्यालय व रुग्णालयात दाखल केले. तेथे त्यांच्यावर अतिदक्षता विभागात उपचार सुरू असल्याचे समजते. या प्रकरणी संबंधित पोलीस ठाण्यात गुन्हा दाखल करण्याची प्रक्रिया सुरू असल्याची माहिती आहे. हल्ल्यामागील नेमके कारण, संशयितांचा सहभाग आणि घटनेचे इतर तपशील पोलीस तपासानंतर स्पष्ट होणार आहेत. या घटनेमुळे खेडी परिसरात खळबळ उडाली असून, संबंधितांवर कोणती कारवाई होते, याकडे नागरिकांचे लक्ष लागले आहे.