शहरातील एका नामांकित महाविद्यालय परिसरामध्ये कॉफी शॉपच्या नावाखाली तरुण-तरुणींना अश्लील चाळ्यांसाठी जागा उपलब्ध करून देणाऱ्या 'हेवन कॅफे'वर रामानंद नगर पोलिसांनी मोठी कारवाई केली आहे. याप्रकरणी कॅफे मालकाविरुद्ध गुन्हा दाखल करण्यात आला आहे.
दामिनी पथकाची धाडसी कारवाई:
पोलिस पेट्रोलिंग करत असताना दामिनी पथकाला गुप्त माहिती मिळाली की, college परिसरातील 'हेवन कॅफे'मध्ये महाविद्यालयीन मुले-मुलींना अश्लील चाळे करण्यासाठी स्वतंत्र जागा उपलब्ध करून दिली जात आहे. या माहितीच्या आधारे रामानंद नगर पोलिस ठाण्याचे पोलिस निरीक्षक मधुकर साळवे यांच्या मार्गदर्शनाखाली उपनिरीक्षक सचिन रणशेवरे, जितेंद्र राजपूत आणि दामिनी पथकातील महिला पोलिसांनी कॅफेवर थेट छापा टाकला.
कॅफेमध्ये कॉफीच नव्हती!
पोलिसांनी छापा टाकला तेव्हा कॅफेमधील कंपार्टमेंटमध्ये काही जण अश्लील चाळे करताना रंगेहाथ आढळले. पोलिसांनी तेथे उपस्थित तरुण-तरुणींना तोंडी समज देऊन सोडून दिले. धक्कादायक बाब म्हणजे, तपासणी दरम्यान या ठिकाणी कॉफी शॉपचा कुठलाही अधिकृत परवाना नव्हता, तसेच कॅफेमध्ये कॉफी बनवण्याचे साहित्य किंवा कोणतेही खाद्यपदार्थ आढळून आले नाहीत. केवळ अश्लील चाळ्यांसाठीच हे केंद्र चालवले जात असल्याचे उघड झाले.
मालकावर गुन्हा दाखल:
याप्रकरणी कॅफे मालक विजय राजेंद्र पाटील (वय २९, रा. खेडी, ता. जळगाव) याच्याविरुद्ध रामानंद नगर पोलिस ठाण्यात रीतसर गुन्हा दाखल करण्यात आला आहे.
⚡ ब्रेकिंग NEWS