जलसंधारणाचे महत्त्व जनसामान्यांपर्यंत पोहोचविण्यासाठी शुक्रवार, २१ ऑगस्ट रोजी सकाळी ६ वाजता सांगलीत ‘महावॉकेथॉन २०२६ – वॉक फॉर वॉटर’ आयोजित करण्यात आली आहे. मृद व जलसंधारण विभागाच्या वतीने आयोजित या उपक्रमात नागरिकांनी मोठ्या संख्येने सहभागी व्हावे, असे आवाहन जिल्हाधिकारी डॉ. मैनाक घोष यांनी केले.पालकमंत्री चंद्रकांत पाटील यांच्या मार्गदर्शनाखाली वालचंद कॉलेजच्या मागील गेट (१०० फूटी रोड) ते बापट मळा आणि पुन्हा वालचंद कॉलेज असा महावॉकेथॉनचा मार्ग राहणार आहे.
१५ ऑगस्ट २०२६ ते २६ जानेवारी २०२७ या कालावधीत राज्यभर ‘जलसंधारण अभियान’ राबविण्यात येणार असून, जलयुक्त शिवार २.०, गाळमुक्त धरण-गाळयुक्त शिवार, अमृत सरोवर आणि प्रधानमंत्री कृषी सिंचन योजना यांसारख्या उपक्रमांची जनजागृती करण्यात येणार आहे.
‘माती वाचवा-पाणी जपा आणि सुरक्षित भविष्य घडवा’ हा मोहिमेचा मुख्य संदेश असून, हवामान बदलाच्या पार्श्वभूमीवर जलसंधारणासाठी लोकसहभाग वाढविणे हा या उपक्रमाचा उद्देश आहे.
महावॉकेथॉनसाठी ऑनलाइन QR कोडद्वारे नोंदणीची सुविधा उपलब्ध असून सहभागी नागरिकांना ई-प्रमाणपत्र देण्यात येणार आहे. माजी मुख्यमंत्री स्व. सुधाकरराव नाईक यांच्या जयंतीनिमित्त २१ ऑगस्ट हा दिवस ‘जलसंधारण दिन’ म्हणून साजरा केला जातो. यानिमित्त राज्यभर १५ ते २१ ऑगस्टदरम्यान जलसंधारण सप्ताह राबविला जात आहे.
राज्याचे मृद व जलसंधारण मंत्री संजय राठोड यांच्या संकल्पनेतून हा उपक्रम राबविण्यात येत असून, २१ ऑगस्ट रोजी संपूर्ण महाराष्ट्रात एकाच वेळी महावॉकेथॉन आयोजित करण्यात आली आहे.
⚡ ब्रेकिंग NEWS