असलदे पोलीस पाटील पदाचा अतिरिक्त कार्यभार नांदगावच्या पोलीस पाटलांकडे तहसीलदार दीक्षांत देशपांडे यांचे आदेश;

कणकवली : कणकवली तालुक्यातील असलदे गावातील रिक्त असलेल्या पोलीस पाटील पदाचा अतिरिक्त कार्यभार आता नांदगाव येथील पोलीस पाटील वृषाली ऋषिकेश मोरजकर यांच्याकडे सोपविण्यात आला आहे. याबाबत कणकवली तहसीलदार दीक्षांत देशपांडे यांनी आदेश काढले आहेत. ग्रामस्थांच्या मागणीची दखल घेत प्रशासनाने हा निर्णय घेतल्याने असलदे ग्रामस्थांची गैरसोय दूर होणार आहे.

असलदे ग्रामस्थांच्या मागणीनुसार गावासाठी स्वतंत्र पोलीस पाटील व्यवस्था करावी अथवा जवळच्या गावातील पोलीस पाटलांकडे अतिरिक्त कार्यभार सोपवावा, अशी मागणी करण्यात आली होती. यापूर्वी असलदे पोलीस पाटील पदाचा अतिरिक्त कार्यभार कोळोशी येथील पोलीस पाटील संजय मारुती गोरुले यांच्याकडे होता. मात्र कोळोशी गाव अंतरावर असल्याने पोलीस पाटील दाखले तसेच अन्य आवश्यक कामांसाठी नागरिकांना अडचणींचा सामना करावा लागत होता.

प्रशासकीय सोयीच्या दृष्टीने असलदे पोलीस पाटील पदाचा अतिरिक्त कार्यभार नांदगाव येथील पोलीस पाटील वृषाली मोरजकर यांच्याकडे सोपविण्यात आला आहे. त्यामुळे असलदे ग्रामस्थांना विविध दाखले व पोलीस पाटील कार्यालयाशी संबंधित कामांसाठी होणारी गैरसोय कमी होणार आहे.

स्वातंत्र्य दिनानिमित्त असलदे ग्रामपंचायत येथे ध्वजारोहण करण्यात आले. देशसेवा करणाऱ्या भारतीय सैनिकांप्रती सद्भावना व्यक्त करण्यात आली. त्यानंतर प्रभारी पोलीस पाटील म्हणून वृषाली मोरजकर यांनी पदभार स्वीकारल्यानंतर ग्रामस्थांच्या वतीने त्यांचा सत्कार करण्यात आला. सरपंच चंद्रकांत डामरे व चेअरमन भगवान लोके यांच्या हस्ते शाल व पुष्पगुच्छ देऊन त्यांचा सत्कार करण्यात आला.

यावेळी उपसरपंच सचिन परब, व्हा. चेअरमन दयानंद हडकर, तंटामुक्त समिती अध्यक्ष श्रीकृष्ण परब, सोसायटी संचालक शत्रुघ्न डामरे, परशुराम परब, विजय आचरेकर, संतोष परब, विजय डामरे, महेश लोके, रघुनाथ लोके, अनिल नरे, प्रशांत परब, वासुदेव दळवी, पत्रकार ऋषिकेश मोरजकर, बाबाजी शिंदे, ग्रामपंचायत सदस्या सुवर्णा दळवी, सपना डामरे, आनंदी खरात, विद्या आचरेकर, संतोष घाडी, सुदीन तांबे, एकनाथ डामरे, अनंत परब, गवस साटविलकर, तलाठी माधुरी काबरे, ग्रामसेवक संजय तांबे, कर्मचारी मधुसुदन परब, सत्यवान घाडी, प्रकाश वाळके, प्रतीक्षा परब, शिक्षक जंगले, शिक्षिका अर्चना लोके, विनिता सावंत, आशा सेविका भाग्यश्री नरे, अंगणवाडी सेविका कोमल परब आदी ग्रामस्थ व कृषीमित्र उपस्थित होते. विद्यार्थ्यांनी राष्ट्रगीत व राज्यगीत सादर केले.

ग्रामस्थांच्या मागणीची दखल घेऊन प्रशासकीय पातळीवर कार्यवाही केल्याबद्दल ग्रामस्थांनी कणकवलीचे प्रांताधिकारी जगदीश कातकर, तहसीलदार दीक्षांत देशपांडे तसेच संबंधित प्रशासनाचे आभार मानले. ग्रामस्थांच्या एकजुटीमुळे असलदे पोलीस पाटील पदाचा प्रश्न मार्गी लागल्याची भावना यावेळी व्यक्त करण्यात आली.