गुरे आडवी आल्याने डंपर पलटी; सहा प्रवासी बचावले कोल्हापूर-तळेरे मार्गावर एडगाव-रामेश्वरवाडी येथे अपघात; सुदैवाने जीवितहानी टळली

वैभववाडी (प्रतिनिधी) : कोल्हापूर-तळेरे मार्गावरील एडगाव-रामेश्वरवाडी येथे गुरे अचानक रस्त्यावर आडवी आल्याने चालकाचा डंपरवरील ताबा सुटून डंपर रस्त्याच्या बाहेर जाऊन पलटी झाला. बुधवारी सायंकाळी सहाच्या सुमारास हा अपघात घडला. सुदैवाने या अपघातात कोणीही जखमी झाले नाही. मात्र, डंपरचे मोठे नुकसान झाले आहे.

मिळालेल्या माहितीनुसार, हा डंपर कोल्हापूरहून तळेरेच्या दिशेने जात होता. एडगाव-रामेश्वरवाडी परिसरात अचानक गुरे रस्त्यावर आडवी आली. त्यामुळे चालकाचा डंपरवरील ताबा सुटला आणि डंपर रस्त्याच्या बाहेर जाऊन पलटी झाला.

अपघातावेळी डंपरमध्ये चालकासह तीन महिला, एक पुरुष आणि दोन लहान मुले असे प्रवासी होते. डंपर पलटी झाल्याचे समजताच स्थानिक नागरिकांनी घटनास्थळी धाव घेतली. डंपरच्या केबिनमध्ये अडकलेल्या सर्व प्रवाशांना नागरिकांनी सुखरूप बाहेर काढले. सुदैवाने कोणालाही दुखापत झाली नाही.

घटनेची माहिती मिळताच वैभववाडी पोलिस ठाण्याचे पोलिस उपनिरीक्षक उल्हास जाधव व त्यांच्या सहकाऱ्यांनी घटनास्थळी दाखल होत अपघाताची पाहणी केली. या अपघातामुळे काही काळ मार्गावर वाहतुकीची कोंडी निर्माण झाली होती.