शिवसेना नगरसेवक ६ वर्षांसाठी अपात्र; जिल्हाधिकाऱ्यांचा मोठा निर्णय

महाराष्ट्राच्या राजकारणात मोठी घडामोड घडली आहे. मनमाड नगरपरिषद निवडणुकीत प्रभाग क्रमांक ८-ब मधून नागरिकांच्या मागासवर्ग (ओबीसी) राखीव जागेवर निवडून आलेले शिवसेना (शिंदे गट) नगरसेवक शेख मजीद इब्राहिम यांना ६ वर्षांसाठी अपात्र घोषित करण्यात आले आहे. नाशिकचे जिल्हाधिकारी आयुष प्रसाद यांनी यासंदर्भातील आदेश जारी केल्याने स्थानिक राजकीय वर्तुळात एकच खळबळ उडाली आहे.मनमाड नगरपरिषदेच्या निवडणुकीवेळी शेख मजीद इब्राहिम यांनी जात प्रमाणपत्र वैधता पडताळणीसाठी आवश्यक कागदपत्रे सादर केली होती. मात्र, नाशिक जिल्हा जात प्रमाणपत्र पडताळणी समितीने त्यांचे जात प्रमाणपत्र अवैध ठरवले. तसेच, कायद्यानुसार निश्चित मुदतीत जात वैधता प्रमाणपत्र सादर करण्यातही ते अपयशी ठरल्याचे आदेशात नमूद करण्यात आले आहे.
या पार्श्वभूमीवर महाराष्ट्र नगरपरिषदा, नगरपंचायती आणि औद्योगिक नगरी अधिनियम, १९६५ मधील कलम १६ (१-ब)(अ) अंतर्गत जिल्हाधिकाऱ्यांनी त्यांना नगरपरिषदेच्या सदस्यपदासाठी सहा वर्षांसाठी अपात्र ठरवले आहे.या निर्णयाची प्रत राज्य निवडणूक आयोग आणि मनमाड नगरपरिषदेच्या मुख्याधिकाऱ्यांनाही पाठवण्यात आली आहे. या कारवाईनंतर मनमाड नगरपरिषदेतील राजकीय समीकरणे बदलण्याची शक्यता व्यक्त होत असून, रिक्त झालेल्या जागेबाबत पुढे काय निर्णय होतो याकडे सर्वांचे लक्ष लागले आहे.