सोशल मीडियावर पोस्ट टाकण्याच्या कारणावरून जातीवाचक शिवीगाळ
सोशल मीडियावर पोस्ट केल्याच्या कारणावरून एका युवकाला जातीवाचक शिवीगाळ करत जीवे मारण्याची धमकी दिल्याचा प्रकार समोर आला आहे. याप्रकरणी विटा पोलीस ठाण्यात आयआरएस अधिकारी सचिन मोटे यांच्यासह दोघांविरुद्ध गुन्हा दाखल करण्यात आला आहे. ही घटना ३० मे २०२६ रोजी सायंकाळी सहा वाजण्याच्या सुमारास भिवघाट येथील खासगी रुग्णालयात घडली. याप्रकरणी विकास अनिल कांबळे (वय ३२, रा. बेणापूर, ता. खानापूर) यांनी विटा पोलिसांत फिर्याद दिली आहे.याबाबत पोलिसांनी सांगितले की, विकास कांबळे हे ३० मे रोजी भिवघाट येथील एका खासगी रुग्णालयात होते. यावेळी आटपाडी तालुक्यातील संशयित सचिन बिरा मोटे (रा.विभुतवाडी) आणि अक्षय अर्जुन (रा.अर्जुनवाडी) यांनी विकास कांबळे यांच्या केबिनमध्ये येऊन त्यांना जाब विचारला."तू आमच्या विरोधात सोशल मीडियावर पोस्ट का करतोस ? आमचे भांडण आहे, आम्ही ते कधीही मिटवून घेऊ शकतो, तू कशाला मध्ये वळवळ करतोस? " असे म्हणत या दोघांनी कांबळे यांच्या जातीवरून अपमानास्पद शब्द वापरले. तसेच, "जर तू आमच्या विरोधात पोस्ट टाकणे बंद केले नाहीस, तर तुला सोडणार नाही," अशी धमकी दिली. या घटनेनंतर विकास कांबळे यांनी विटा पोलीस ठाण्यात धाव घेऊन तक्रार नोंदवली. या तक्रारीवरून विटा पोलिसांनी आरोपींविरुद्ध भारतीय न्याय संहिता कलम ३५१(२) आणि अनुसूचित जाती व अनुसूचित जमाती (अत्याचार प्रतिबंधक) अधिनियम १९८९ च्या कलम ३ (१) (आर), ३(१)(एस) व ३(२)(ब) अन्वये गुन्हा दाखल केला आहे. पुढील तपास उपविभागीय पोलीस अधिकारी विपुल पाटील करीत आहेत.