रेड झोनची सीमा तातडीने जाहीर करा-शिवसेना नगरसेवक ऐश्वर्या राजेंद्र तरस

पुणे प्रतिनिधी :बापूसाहेब नामदास
पिंपरी-चिंचवड महानगरपालिका हद्दीतील रेड झोन क्षेत्राची सीमा तातडीने निश्चित करून जाहीर करावी, अशी मागणी नगरसेविका ऐश्वर्या राजेंद्र तरस यांनी महापालिका प्रशासनाकडे निवेदनाद्वारे केली आहे.
निवेदनात नमूद करण्यात आले आहे की, रेड झोन क्षेत्राची आवश्यक मोजणी प्रक्रिया पूर्ण झाली असली तरी अद्याप अंतिम सीमा निश्चित करण्यात आलेली नाही. त्यामुळे या परिसरातील नागरिक, मालमत्ता धारक तसेच विकासकामांचे नियोजन करणाऱ्या संबंधित घटकांना अनेक अडचणींचा सामना करावा लागत आहे.
सीमा निश्चित नसल्याने नागरिकांमध्ये संभ्रमाचे वातावरण निर्माण झाले असून विविध प्रशासकीय कामेही प्रलंबित राहत आहेत. तसेच मालमत्तांच्या व्यवहारांवर आणि विकासकामांच्या नियोजनावर त्याचा परिणाम होत असल्याचे निवेदनात म्हटले आहे.
महापालिकेने पूर्ण झालेल्या मोजणीच्या आधारे रेड झोनची अंतिम सीमा तातडीने जाहीर करून आवश्यक कार्यवाही करावी, अशी मागणी ऐश्वर्या तरस यांनी केली आहे.
या विषयाची गंभीरता लक्षात घेऊन प्रशासनाने लवकरात लवकर निर्णय घ्यावा, अशी अपेक्षाही त्यांनी व्यक्त केली.