महिला नेत्यांचा अवमान महाराष्ट्राच्या संस्कृतीला शोभणारा नाही; हर्षवर्धन सपकाळ यांनी जाहीर माफी मागावी – निशिकांत कडुलकर

उपमुख्यमंत्री सुनेत्राताई पवार यांच्याबद्दल करण्यात आलेल्या कथित अपमानास्पद व आक्षेपार्ह वक्तव्याचा सिंधुदुर्ग जिल्हा राष्ट्रवादी युवक काँग्रेसचे जिल्हाध्यक्ष निशिकांत राजेंद्र कडुलकर यांनी तीव्र शब्दांत निषेध केला आहे. संबंधित वक्तव्याबद्दल हर्षवर्धन सपकाळ यांनी जाहीर माफी मागावी, अशी मागणी कडुलकर यांनी केली आहे.
राजकारणात वैचारिक मतभेद असणे स्वाभाविक आहे. मात्र, महिला लोकप्रतिनिधींबद्दल वक्तव्य करताना सभ्यतेची आणि सन्मानाची मर्यादा पाळली पाहिजे, असे कडुलकर यांनी म्हटले आहे.
हर्षवर्धन सपकाळ यांच्या वक्तव्यामुळे महिला भगिनींच्या भावना दुखावल्या असून, महाराष्ट्राच्या संस्कृतीचाही अवमान झाल्याची भावना त्यांनी व्यक्त केली. महिलांचा अपमान कोणत्याही परिस्थितीत सहन केला जाणार नाही, असा इशाराही कडुलकर यांनी दिला.
“महाराष्ट्राला महिलांचा सन्मान करण्याची मोठी परंपरा आहे. राजकारणाचा स्तर खालावेल अशा प्रकारची वक्तव्ये करणे अत्यंत दुर्दैवी आहे. प्रत्येकाने महाराष्ट्राच्या संस्कृतीचे आणि महिलांच्या सन्मानाचे भान ठेवले पाहिजे,” असे निशिकांत कडुलकर यांनी सांगितले.
दरम्यान, हर्षवर्धन सपकाळ यांच्या वक्तव्याचा सिंधुदुर्ग जिल्हा राष्ट्रवादी युवक काँग्रेसच्या वतीने तीव्र निषेध करण्यात येत असून, त्यांनी आपल्या वक्तव्याबद्दल जाहीर माफी मागावी, अशी मागणी जिल्हाध्यक्ष निशिकांत राजेंद्र कडुलकर यांनी केली आहे.