आटपाडीत अवैध शस्त्रांचा मोठा साठा जप्त; चार सराईत गुन्हेगार अटकेत

सांगली जिल्ह्यात अवैध शस्त्रांची तस्करी व बाळगणाऱ्यांविरोधात सुरू असलेल्या कारवाईला स्थानिक गुन्हे अन्वेषण शाखेला मोठे यश मिळाले आहे. रेकॉर्डवरील चार सराईत गुन्हेगारांना अटक करून त्यांच्याकडून ११ गावठी पिस्तुले, दोन स्पेअर मॅगझिन आणि २२ जिवंत काडतुसे असा एकूण ७ लाख ६२ हजार २३० रुपयांचा मुद्देमाल जप्त करण्यात आला आहे. याप्रकरणी आटपाडी पोलीस ठाण्यात भारतीय शस्त्र अधिनियमांतर्गत गुन्हा दाखल करण्यात आला आहे.
पोलीस अधीक्षक तुषार दोशी व अपर पोलीस अधीक्षक कल्पना बारवकर यांच्या मार्गदर्शनाखाली स्थानिक गुन्हे अन्वेषण शाखेचे पोलीस निरीक्षक संजिव झाडे यांच्या पथकाने ही कारवाई केली.
गुप्त माहितीवरून कारवाई
एलसीबीचे सहायक पोलीस निरीक्षक प्रशांत निशाणदार व पोलीस उपनिरीक्षक कुमार पाटील यांना गुप्त माहिती मिळाली होती. रेकॉर्डवरील आरोपी मयुरेश मनोहर आवाडे हा आटपाडी तालुक्यातील मिंध्याळ येथे येणार असून त्याच्याकडे गावठी पिस्तूल असल्याची माहिती पोलिसांना मिळाली.
त्यानुसार पोलिसांनी सापळा रचून मयुरेश आवाडे याला ताब्यात घेतले. त्याच्याकडून दोन गावठी पिस्तुले व दोन जिवंत काडतुसे जप्त करण्यात आली.
चौकशीत मयुरेश आवाडे याने ही शस्त्रे मारुती अशोक गुजळे याच्याकडून घेतल्याची माहिती दिली. त्यानंतर पोलिसांनी मारुती गुजळे याला ताब्यात घेऊन त्याच्याकडून तीन गावठी पिस्तुले, तीन जिवंत काडतुसे आणि एक वायरची पिशवी जप्त केली.
पुढील तपासात आणखी शस्त्रे जप्त
पुढील तपासात वैभव उर्फ गब्बर संजय इंगळे याच्याकडून शस्त्रे मिळाल्याचे निष्पन्न झाले. पोलिसांनी त्याला अटक करून त्याच्याकडून दोन गावठी पिस्तुले, दोन जिवंत काडतुसे, दोन स्पेअर मॅगझिन आणि एक काळी कापडी बॅग जप्त केली.
चौकशीत वैभव इंगळे याने ही शस्त्रे ‘पाजी’ (रा. सेधवा, मध्यप्रदेश) या व्यक्तीकडून विकत घेतल्याची कबुली दिल्याची माहिती पोलिसांनी दिली आहे. संबंधित आरोपीचा शोध सुरू असून, तो सोशल मीडियाच्या माध्यमातून संपर्क साधून अवैध शस्त्रांची विक्री करत असल्याची माहिती तपासात पुढे आली आहे.
चार आरोपी ताब्यात
या कारवाईत अटक करण्यात आलेल्या आरोपींमध्ये—
मयुरेश मनोहर आवाडे — सध्या चाकण, पुणे
मारुती अशोक गुजळे — जांभुळखेडा, ता. खानापूर
वैभव उर्फ गब्बर संजय इंगळे — ताडाची वाडी, ता. खानापूर
‘पाजी’ — रा. सेधवा, मध्यप्रदेश
यांचा समावेश असल्याचे पोलिसांनी सांगितले आहे.
७ लाख ६२ हजारांचा मुद्देमाल जप्त
या कारवाईत पोलिसांनी ११ गावठी पिस्तुले, २ स्पेअर मॅगझिन, २२ जिवंत काडतुसे, काळी कापडी बॅग व वायरची पिशवी असा एकूण ७ लाख ६२ हजार २३० रुपयांचा मुद्देमाल जप्त केला आहे.
या कारवाईत सहायक पोलीस निरीक्षक प्रशांत निशाणदार, पोलीस उपनिरीक्षक कुमार पाटील, पोलीस कर्मचारी हनमंत लोहार, सुनील मरके, प्रमोद सारखें, अभिजित रणनावकर, हेत्राज होळकर, सुमित सूर्यवंशी, रोहन घसते, गणेश शिंदे, सुशांत पिळे तसेच सायबर पोलीस ठाण्याच्या कर्मचाऱ्यांनी सहभाग घेतला.