सुधाकर कोहळे यांच्या विजयासाठी कार्यकर्त्यांनी एकजुटीने काम करावे : प्रचारसभेत आवाहन

रामटेक : नागपूर विभाग पदवीधर मतदारसंघ निवडणूक २०२६ च्या पार्श्वभूमीवर भाजप-महायुतीचे अधिकृत उमेदवार सुधाकर कोहळे यांच्या प्रचारार्थ रामटेक येथे प्रमुख पदाधिकारी व कार्यकर्त्यांची बैठक तसेच प्रचारसभा आयोजित करण्यात आली. या वेळी राज्याचे महसूल मंत्री तथा नागपूर जिल्ह्याचे पालकमंत्री चंद्रशेखर बावनकुळे आणि वित्त व नियोजन राज्यमंत्री ॲड. आशिष जयस्वाल यांनी उपस्थितांना मार्गदर्शन केले.

बैठकीत आगामी निवडणुकीच्या तयारीसंदर्भात चर्चा करण्यात आली. महायुतीच्या उमेदवाराच्या प्रचारासाठी सर्व पदाधिकारी व कार्यकर्त्यांनी एकजुटीने आणि जोमाने काम करण्याचे आवाहन करण्यात आले. पदवीधर मतदारांपर्यंत पोहोचून त्यांच्या समस्या जाणून घेणे आणि त्यावर ठोस उपाययोजना करण्यावर भर देण्यात आला.

यावेळी विरोधकांकडून सरकारविरोधात खोटे नॅरेटिव्ह पसरवून तरुणांची दिशाभूल केली जात असल्याचा आरोप करण्यात आला. लोकशाही धोक्यात असल्याचा आभास निर्माण करण्याऐवजी जनतेने वस्तुस्थितीच्या आधारे विचार करावा, असे आवाहनही करण्यात आले.

रामटेकच्या विकासाबाबत बोलताना गड मंदिर परिसराचा विकास, पर्यटनवाढ, नेहरू मैदान आणि राखी तलाव यांसह विविध विकासकामांचा उल्लेख करण्यात आला. रामटेकच्या विकासाची वाटचाल पुढे सुरू ठेवण्यासाठी सर्वांनी सहकार्य करावे, असे सांगण्यात आले.

निवडणुकीतील शेवटचे पाच दिवस महत्त्वाचे असल्याचे नमूद करत प्रचाराची संपूर्ण व्यवस्था पाहण्यासाठी रामटेकमध्ये थांबणार असल्याचे सांगण्यात आले. यासंदर्भात उपमुख्यमंत्री एकनाथ शिंदे यांनाही कळविण्यात आल्याचे स्पष्ट करण्यात आले. महायुतीचे उमेदवार सुधाकर कोहळे यांना विधान परिषदेत निवडून पाठविण्यासाठी कार्यकर्त्यांनी पूर्ण ताकदीने काम करावे, असे आवाहन करण्यात आले.

या बैठकीला भाजप जिल्हाध्यक्ष आनंदराव राऊत, जिल्हा महामंत्री अनिल निधान, राहुल किरपान, जिल्हा उपाध्यक्ष उदयसिंग यादव, संजय मुलमुले, चंद्रपाल चौकसे, रामटेक नगरपालिकेचे नगराध्यक्ष बीकेंद्र महाजन, मंडळ अध्यक्ष रजत गजभिये, देवलापार मंडळ अध्यक्ष राज हरणे, दुधराम सव्वालाखे, दिलीप देशमुख, मनोज चवरे, नरेंद्र धोपटे, सतीश डोंगरे यांच्यासह अन्य मान्यवर, नगरसेवक, नगरसेविका, पदाधिकारी व कार्यकर्ते उपस्थित होते.