चोरीस गेलेले १२७ ग्रॅम सोन्याचे दागिने हस्तगत; तासगाव पोलिसांची कारवाई १२७.१८ ग्रॅम सोन्याचे दागिने न्यायालयाच्या आदेशाने हक्कदाराच्या स्वाधीन

दैनिक आखुर / संतोष एडके, तासगाव
तासगाव : तासगाव पोलीस ठाण्याच्या हद्दीत घडलेल्या चोरीच्या गुन्ह्याचा छडा लावत पोलिसांनी सुमारे ४ लाख ८० हजार रुपये किमतीचे १२७.१८ ग्रॅम सोन्याचे दागिने हस्तगत केले. न्यायालयाच्या आदेशानुसार हे दागिने संबंधित हक्कदार फिर्यादीला परत करण्यात आले. पोलिसांच्या या कारवाईमुळे फिर्यादीला मोठा दिलासा मिळाला आहे.
तासगाव पोलीस ठाण्यात गुन्हा रजिस्टर क्रमांक ३४०/२०२६, भारतीय न्याय संहितेच्या कलम ३३१(३), ३०५(अ) अन्वये गुन्हा दाखल करण्यात आला होता. शिरगाव (ता. तासगाव) येथील मूर्ती गोविंदराव पाटील (वय ३६) यांच्या तक्रारीवरून पोलिसांनी तपासाची चक्रे गतिमान केली.
तपास पथकाकडून गुन्ह्याचा छडा
सांगली जिल्ह्याचे पोलीस अधीक्षक तुषार दोशी, अपर पोलीस अधीक्षक कल्पना बारवकर आणि उपविभागीय पोलीस अधिकारी किरण अवचर यांच्या मार्गदर्शनाखाली तासगाव पोलीस ठाण्याचे पोलीस निरीक्षक विशाल टकले यांनी तपास पथकाची नियुक्ती केली.
या पथकात सपोनि दीपक पाटील, पोहेकॉ अमर सूर्यवंशी, पोहेकॉ सुरेश भोसले, पोशी विवेक यादव, पोशी सुरज जगदाळे, पोशी निलेश डांगे, पोशी संतोष माळी, पोशी योगेश जाधव, पोशी शहाजी भोसले आणि पोशी सागर पाटील यांचा समावेश होता.
पथकाने गुन्ह्याचा तपास करत संशयित आरोपीकडून चोरीस गेलेले सोन्याचे दागिने हस्तगत केले. यामध्ये नेकलेस, बांगड्या, कर्णफुले, मंगळसूत्र, बोरमाळ, गळ्यातील दागिना आणि अंगठी अशा विविध दागिन्यांचा समावेश असून, त्यांची एकूण किंमत सुमारे ४ लाख ८० हजार रुपये आहे.
न्यायालयाच्या आदेशाने दागिने फिर्यादीला परत
तपासादरम्यान हस्तगत करण्यात आलेले १२७.१८ ग्रॅम सोन्याचे दागिने प्रथमवर्ग न्याय दंडाधिकारी, तासगाव यांच्या आदेशानुसार संबंधित हक्कदार फिर्यादीला परत करण्यात आले. उपविभागीय पोलीस अधिकारी किरण अवचर यांच्या हस्ते दागिने फिर्यादीकडे सुपूर्द करण्यात आले.
चोरीस गेलेला मौल्यवान मुद्देमाल परत मिळाल्याने फिर्यादीला दिलासा मिळाला असून, गुन्ह्याचा तपास करून मुद्देमाल हस्तगत करणाऱ्या तासगाव पोलिसांच्या तपास पथकाचे कौतुक होत आहे.