राज्यभरातील पत्रकार आज सांगलीत; शिवराज काटकर स्वीकारणार राष्ट्रीय अध्यक्षपदाची धुरा. पत्रकारितेच्या नव्या पर्वाचा ऐतिहासिक सोहळा सांगलीत; राज्यभरातील पत्रकारांची उपस्थिती राहणार

: मराठी पत्रकार परिषदेचे नूतन राष्ट्रीय अध्यक्ष शिवराज काटकर यांच्या पदग्रहण सोहळ्याचा ऐतिहासिक कार्यक्रम आज, रविवार दि. ३० ऑगस्ट २०२६ रोजी सांगलीतील विश्रामबाग येथील पोलीस मुख्यालयातील कृष्णा मॅरेज हॉल येथे होणार आहे. या सोहळ्यानिमित्त पश्चिम महाराष्ट्र पत्रकार मेळावा-२०२६ आयोजित करण्यात आला असून, राज्यभरातील पत्रकारांची मोठी उपस्थिती राहणार आहे.
मराठी पत्रकार परिषद, सांगली जिल्हा मराठी पत्रकार संघ आणि डिजिटल मीडिया परिषदेच्या संयुक्त विद्यमाने या कार्यक्रमाचे आयोजन करण्यात आले आहे. सकाळी १० वाजता शिवराज काटकर यांच्या राष्ट्रीय अध्यक्षपदाचा पदग्रहण सोहळा होणार असून, या ऐतिहासिक सोहळ्यासाठी सांगली सज्ज झाली आहे.
कार्यक्रमाची सुरुवात क्रांतिसिंह नाना पाटील यांच्या पुतळ्यास अभिवादनाने होणार आहे. त्यानंतर विश्रामबाग ते कृष्णा मॅरेज हॉल अशी शोभायात्रा काढण्यात येणार आहे. सकाळच्या सत्रात पत्रकार प्रशिक्षण कार्यशाळा, राष्ट्रीय कार्यकारिणीची सभा तसेच अन्य कार्यक्रमांचे आयोजन करण्यात आले आहे.
दुपारच्या सत्रात मुंबई प्रेस क्लबच्या नवनिर्वाचित संचालक मंडळाचा तसेच सांगली जिल्ह्यातील संपादकांचा सत्कार करण्यात येणार आहे. पश्चिम महाराष्ट्रातील पत्रकारांचा मेळावा यावेळी होणार असून, पत्रकारितेतील बदलती आव्हाने, पत्रकार सुरक्षा, ग्रामीण पत्रकारांचे प्रश्न, डिजिटल माध्यमांचा वाढता प्रभाव, फेक न्यूज आणि कृत्रिम बुद्धिमत्तेमुळे पत्रकारितेत होत असलेले बदल यावर विचारमंथन होणार आहे.
पत्रकार प्रशिक्षण कार्यशाळेत सहभागी पत्रकारांना मार्गदर्शन करण्यात येणार असून, सहभागी पत्रकारांना प्रमाणपत्रांचे वितरण केले जाणार आहे. बदलत्या काळातील पत्रकारितेची दिशा, आधुनिक तंत्रज्ञानाचा वापर आणि पत्रकारांच्या संघटनात्मक प्रश्नांवरही या मेळाव्यात चर्चा होणार आहे.
शिवराज काटकर यांनी गेल्या चार दशकांहून अधिक काळ पत्रकारिता क्षेत्रात कार्य केले असून, निर्भीड, तत्त्वनिष्ठ आणि समाजाभिमुख पत्रकारितेचा ठसा उमटविला आहे. सामान्यांच्या प्रश्नांना वाचा फोडणे आणि पत्रकारांच्या प्रश्नांसाठी सातत्याने आवाज उठविणे ही त्यांच्या पत्रकारितेची वैशिष्ट्ये मानली जातात.
शिवराज काटकर यांच्या राष्ट्रीय अध्यक्षपदाच्या पदग्रहण सोहळ्याच्या निमित्ताने राज्यभरातील पत्रकार एकाच छताखाली एकत्र येणार असल्याने या कार्यक्रमाला विशेष महत्त्व प्राप्त झाले आहे. त्यांच्या राष्ट्रीय नेतृत्वातून पत्रकारांच्या विविध प्रश्नांना प्रभावी व्यासपीठ मिळेल.
आजच्या या कार्यक्रमासाठी सांगली जिल्हा मराठी पत्रकार संघ आणि डिजिटल मीडिया परिषदेच्या संयुक्त विद्यमाने भव्य असे नियोजन केले आहे.