सांगली ग्रामीण पोलिसांनी जुनी धामणी (ता. मिरज) येथील शासकीय सांडपाणी व्यवस्थापन योजनेवरील साहित्य चोरी करणाऱ्या टोळीचा पर्दाफाश करत दोन आरोपींना अटक केली आहे. या कारवाईत चोरीस गेलेले सुमारे ₹६९ हजार किमतीचे साहित्य जप्त करण्यात आले आहे.
याप्रकरणी सांगली ग्रामीण पोलीस ठाण्यात गुन्हा क्रमांक २१५/२०२६ भारतीय न्याय संहिता (BNS) कलम ३०३(२) व ३(५) अन्वये गुन्हा दाखल करण्यात आला आहे. प्रांजल संजय घावळकर यांनी याबाबत फिर्याद दिली होती. या गुन्ह्याचा तपास पोलीस हेडकॉन्स्टेबल अभिजित पाटील यांच्याकडे सोपविण्यात आला होता.
पोलीस अधीक्षक तुषार दोषी, अपर पोलीस अधीक्षक कल्पना बारावकर आणि उपविभागीय पोलीस अधिकारी संदीप भागवत यांच्या मार्गदर्शनाखाली पोलीस निरीक्षक अभिजित देशमुख यांच्या नेतृत्वाखाली विशेष पथकाने गोपनीय माहितीच्या आधारे तपास सुरू केला. तपासादरम्यान आरोपी चोरीचा माल विक्रीसाठी येणार असल्याची माहिती मिळाल्यानंतर पोलिसांनी सापळा रचून दोघांना ताब्यात घेतले. चौकशीदरम्यान आरोपींनी चोरीची कबुली दिली.
अटक करण्यात आलेल्या आरोपींमध्ये अक्षय अनिल चव्हाण (वय ३०) व अनिल मारुती कोळी (वय ४२, दोघेही रा. ग्रामपंचायतीजवळ, जुनी धामणी, ता. मिरज) यांचा समावेश आहे.
कारवाईदरम्यान पोलिसांनी एक हिलमन मोटारसायकल, पाणी उपसा करणारा पंप, दोन फोल्डिंग पाईप आणि लोखंडी साखळीचे बंडल असा एकूण ₹६९ हजार किमतीचा मुद्देमाल जप्त केला आहे. या प्रकरणाचा पुढील तपास पोलीस हेडकॉन्स्टेबल अभिजित पाटील करीत आहेत.
⚡ ब्रेकिंग NEWS