तासगावात शिवराज्याभिषेक दिन उत्साहात साजरा

येथील विद्रोही सांस्कृतिक चळवळ, अंधश्रद्धा निर्मूलन समिती, राष्ट्र सेवा दल, तसेच विविध पुरोगामी पक्ष आणि संघटनांच्या संयुक्त विद्यमाने छत्रपती शिवाजी महाराज यांचा राज्याभिषेक दिन अत्यंत उत्साहात साजरा करण्यात आला. या निमित्ताने आयोजित कार्यक्रमात शिवरायांच्या समतेच्या आणि लोककल्याणकारी विचारांचा जागर करण्यात आला.
​कार्यक्रमाच्या सुरुवातीला छत्रपती शिवाजी महाराज यांच्या विचारांचे, चरित्राचे आणि अलौकिक कर्तृत्वाचे स्मरण करण्यात आले. याप्रसंगी उपस्थित शिवमावळ्यांना अमर खोत यांनी समतेची आणि सामाजिक बांधिलकीची शपथ दिली. "शिवरायांच्या समतेच्या मूल्यविचाराला अंगीकारून आम्ही कोणत्याही धर्माचा द्वेष करणार नाही, महिलांचा सन्मान राखू आणि कोणत्याही अंधश्रद्धेला बळी पडणार नाही," अशी प्रतिज्ञा यावेळी सर्वांनी घेतली.
​स्थानिक प्रश्नांवर प्रशासनाकडे पाठपुरावा करणार
उत्सवाचे औचित्य साधून तासगाव शहरातील विविध प्रलंबित प्रश्नांवर संघटितपणे एकत्र येऊन काम करण्याची गरज उपस्थितांनी व्यक्त केली. यामध्ये प्रामुख्याने:
१) तासगाव येथील छत्रपती शिवाजी महाराज आणि डॉ. बाबासाहेब आंबेडकर यांच्या पुतळ्यांच्या रंगरंगोटीची व सुशोभीकरणाची तातडीने गरज असून, त्याबाबत प्रशासनाला निवेदन देण्याचा निर्णय झाला.
२) सांगली नाका येथील बंद असलेले नगरवाचनालय पूर्ववत सुरू व्हावे, यासाठी प्रशासनाकडे आग्रही पाठपुरावा करण्यासंबंधी सविस्तर विचारविनिमय करण्यात आला.
​मान्यवरांची उपस्थिती
या सोहळ्याला ज्येष्ठ विचारवंत डॉ. बाबूराव गुरव, बाबूराव जाधव, प्रा. वासुदेव गुरव, विनायक गुरव, प्रा. राजेश रोमन, उत्तम परिट, सौ. नुतन परिट, शामराव पाटील, सुधाकर कोळी, प्रा. रमेश कुंभार, शिवाजी शिंदे, भरत थोरात, बाबासो थोरात, दत्तात्रय बामणे, जगन्नाथ शेवाळे, परशराम लुगडे, चित्रपट निर्माते प्रा. सूर्यकांत शिंदे, सुधीर नलवडे, विशाल चांदुरकर, प्रा. वल्लभदास शेळके, रमेश गायकवाड यांच्यासह अनेक कार्यकर्ते व नागरिक मोठ्या संख्येने उपस्थित होते. कार्यक्रमाचे आभार प्रा. वासुदेव गुरव यांनी मानले.