माहिती न मिळाल्याने ग्रामपंचायत कार्यालयासमोर आमरण उपोषण

घेरडी, ता. सांगोला ग्रामपंचायत घेरडी येथील सन 2021 ते 2026 या कालावधीतील विकासकामांची माहिती मिळावी यासाठी अर्ज करूनही तब्बल 88 दिवस उलटून माहिती उपलब्ध न झाल्याने ग्रामस्थ अनिल तानाजी मोटे यांनी गुरुवारी (दि. 4) सकाळी 9 वाजल्यापासून ग्रामपंचायत कार्यालयासमोर आमरण उपोषण सुरू केले आहे.

अनिल मोटे यांनी 7 मार्च 2026 रोजी ग्रामपंचायतीकडे विकासकामांच्या माहितीसाठी अर्ज सादर केला होता. मात्र, निर्धारित कालावधीनंतरही माहिती न मिळाल्याने त्यांनी लोकशाही मार्गाने आंदोलनाचा पवित्रा घेतला आहे. विशेष म्हणजे हे आंदोलन पूर्णपणे शांततामय असून उपोषणस्थळी कोणताही वैयक्तिक बॅनर, पोस्टर किंवा फलक लावण्यात आलेला नाही. तसेच कोणत्याही प्रकारची घोषणाबाजी अथवा गोंधळ न करता ‘बॅनरमुक्त सत्याग्रह’ सुरू करण्यात आला आहे.

उपोषणाच्या पार्श्वभूमीवर कायदा व सुव्यवस्था राखण्यासाठी सांगोला पोलिसांचे पथक घटनास्थळी तैनात करण्यात आले आहे. सायंकाळी 8 वाजेपर्यंत अनिल मोटे हे ग्रामपंचायत कार्यालयाच्या पायरीवर उपोषणास बसून होते. त्यांची प्रकृती स्थिर असल्याची माहिती मिळाली.

याबाबत बोलताना अनिल मोटे म्हणाले, “माझा लढा कोणत्याही व्यक्ती किंवा संस्थेविरोधात नाही. ग्रामपंचायतीच्या विकासकामांबाबत माहिती मिळणे हा नागरिक म्हणून माझा अधिकार आहे. 7 मार्च रोजी अर्ज करूनही आजपर्यंत माहिती मिळालेली नाही. त्यामुळे नाईलाजाने शांततेच्या आणि लोकशाही मार्गाने आमरण उपोषण सुरू केले आहे. ग्रामपंचायतीने नियमानुसार माहिती उपलब्ध करून द्यावी, एवढीच माझी अपेक्षा आहे.”

दरम्यान, उपोषणाची माहिती मिळताच अनेक ग्रामस्थांनी घटनास्थळी भेट देऊन परिस्थितीची पाहणी केली. प्रशासनाकडून या प्रकरणी कोणती भूमिका घेतली जाते आणि मागणीवर काय निर्णय होतो, याकडे ग्रामस्थांचे लक्ष लागले आहे.