विदर्भाला विकासाचे वेगवान पंख; ५४७ कि.मी.च्या चार द्रुतगती महामार्गांना हिरवा कंदील

विदर्भाच्या सर्वांगीण विकासाला गती देणाऱ्या चार महत्त्वाकांक्षी द्रुतगती महामार्ग प्रकल्पांना राज्य मंत्रिमंडळ पायाभूत सुविधा समितीने मंजुरी दिली आहे. मुख्यमंत्री Devendra Fadnavis यांच्या अध्यक्षतेखाली झालेल्या बैठकीत हा महत्त्वपूर्ण निर्णय घेण्यात आला. या प्रकल्पांमुळे महाराष्ट्राच्या पूर्व आणि पश्चिम भागातील संपर्क अधिक वेगवान होणार असून उद्योग, खनिज वाहतूक, पर्यटन आणि रोजगारनिर्मितीला मोठी चालना मिळणार आहे.
बैठकीला उपमुख्यमंत्री Eknath Shinde, मंत्री Chandrashekhar Bawankule, Shivendrasinhraje Bhosale, Uday Samant, राज्यमंत्री Ashish Jaiswal, Indranil Naik यांच्यासह वरिष्ठ अधिकारी उपस्थित होते.
मुख्यमंत्री फडणवीस यांनी विदर्भातील ५४७ कि.मी. लांबीच्या चार प्रवेश नियंत्रित द्रुतगती महामार्ग प्रकल्पांची कामे वेळेत आणि उच्च गुणवत्तेसह पूर्ण करण्याचे निर्देश दिले. या चारही प्रकल्पांची एकूण स्थापत्य किंमत ₹३२,४७८ कोटी असून बांधकाम खर्च तब्बल ₹५१,९०६.३५ कोटी इतका आहे. हे सर्व प्रकल्प महाराष्ट्र राज्य रस्ते विकास महामंडळामार्फत राबविण्यात येणार आहेत.
मंजूर झालेले चार महत्त्वाचे प्रकल्प
१) नागपूर – गोंदिया प्रवेश नियंत्रित द्रुतगती महामार्ग
१६२.३७७ कि.मी. लांबीचा हा ३+३ लेन महामार्ग गवसी मानपूर (नागपूर) ते सावरी (गोंदिया) दरम्यान उभारला जाणार आहे. या मार्गावर ९ इंटरचेंज असतील आणि १६३४.२७ हेक्टर भूसंपादन करण्यात येणार आहे. या प्रकल्पामुळे नागपूर, भंडारा आणि गोंदिया जिल्ह्यांमधील संपर्क अधिक सुलभ होणार आहे.
२) भंडारा – गडचिरोली द्रुतगती महामार्ग
९४.२४१ कि.मी. लांबीचा हा ३+३ लेन महामार्ग बोरगाव (भंडारा) ते ऋणमोचन (चंद्रपूर) दरम्यान उभारला जाणार आहे. या मार्गावर ६ इंटरचेंज असतील. ११८५.७३ हेक्टर भूसंपादन होणार असून भंडारा, गोंदिया आणि गडचिरोली जिल्ह्यांना थेट जोडणी मिळणार आहे.
३) नागपूर – चंद्रपूर द्रुतगती महामार्ग
२०४.७९९ कि.मी. लांबीचा हा २+२ लेन महामार्ग सेलडोह (वर्धा) ते नवेगाव मोरे, चंद्रपूर दरम्यान उभारण्यात येणार आहे. या मार्गासाठी २१५९.०८७ हेक्टर भूसंपादन करण्यात येणार असून ७ इंटरचेंज प्रस्तावित आहेत. नागपूर आणि चंद्रपूर जिल्ह्यातील ९ तालुक्यांना या महामार्गाचा थेट फायदा होणार आहे.
४) नवेगाव मोरे – कोनसारी ते सुरजागड ग्रीनफिल्ड रस्ता
८५.७६५ कि.मी. लांबीचा हा २+२ लेन ग्रीनफिल्ड मार्ग नवेगाव मोरे (चंद्रपूर) ते मंगेर (गडचिरोली) दरम्यान उभारण्यात येणार आहे. यासाठी २८९.०२ हेक्टर भूसंपादन होणार असून चंद्रपूर आणि गडचिरोली जिल्ह्यातील चार तालुक्यांना याचा लाभ मिळणार आहे.
मुख्यमंत्री फडणवीस यांनी नवेगाव मोरे ते सुरजागड मार्ग खनिज वाहतुकीसाठी अत्यंत महत्त्वाचा ठरणार असल्याचे सांगितले. हा मार्ग समृद्धी महामार्गाशी जोडण्यावर विशेष भर देण्यात आला आहे. तसेच पश्चिम महाराष्ट्र आणि कोकणाला जोडणाऱ्या बोगदे व रस्ते प्रकल्पांबाबतही अभ्यास करून सादरीकरण करण्याच्या सूचना देण्यात आल्या.
या महामार्ग प्रकल्पांमुळे विदर्भातील औद्योगिक विकास, गुंतवणूक, कृषी उत्पादनांची वाहतूक, पर्यटन आणि रोजगारनिर्मितीला मोठी चालना मिळणार असून महाराष्ट्राच्या विकासाला नवे बळ मिळणार असल्याचे मानले जात आहे.