पीएसीएल पर्ल्स गुंतवणूकदारांसाठी महत्त्वाची सूचना; बँक खात्यांच्या दुरुस्तीसाठी सेबी पोर्टल पुन्हा सुरू

(पर्ल्स) कंपनीमध्ये गुंतवणूक केलेल्या गुंतवणूकदारांसाठी महत्त्वाची माहिती समोर आली आहे. काही वर्षांपूर्वी पीएसीएल अर्थात पर्ल्स कंपनीने अचानकपणे गुंतवणूकदारांचे पैसे परत देण्यास टाळाटाळ करत देशभरातील आपली कार्यालये बंद केली होती. यामुळे लाखो गुंतवणूकदारांसह कंपनीमध्ये काम करणाऱ्या फिल्ड वर्कर्समध्ये चिंतेचे वातावरण निर्माण झाले होते.
यावेळी जनलोक प्रतिष्ठान सामाजिक संघटना, पुणे यांच्या वतीने सर्व फिल्ड वर्कर्स व गुंतवणूकदारांना एकत्र करून न्यायालयीन लढा उभारण्यात आला. त्यानंतर सेबी संस्थेने निवृत्त न्यायाधीश आर. एम. लोढा यांच्या अध्यक्षतेखाली गुंतवणूकदारांचे पैसे परत मिळवून देण्यासाठी विशेष समिती स्थापन केली होती.
सेबीकडून यासाठी एक ऑनलाइन पोर्टल सुरू करण्यात आले होते. या पोर्टलवर गुंतवणूकदारांनी आवश्यक कागदपत्रांसह पैसे परत मिळण्यासाठी बँक खात्याची माहिती भरली होती. दरम्यानच्या काळात अनेक वर्षे उलटल्यानंतर काही गुंतवणूकदारांची बँक खाती व्यवहाराअभावी किंवा इतर कारणांमुळे बंद झाली आहेत. ज्यांची खाती सुरू आहेत अशा अनेक गुंतवणूकदारांच्या खात्यावर पैसे जमा झाले आहेत.
मात्र, ज्या गुंतवणूकदारांच्या बँक खात्यांमध्ये त्रुटी आढळल्या आहेत, त्यांना दुरुस्तीची संधी देण्यासाठी सेबीचे पोर्टल दिनांक ७ मे २०२६ ते ६ ऑगस्ट २०२६ या कालावधीत पुन्हा सुरू करण्यात येणार आहे.
तरी सर्व पीएसीएल पर्ल्स गुंतवणूकदारांनी आपल्या बँक खात्याची व कागदपत्रांची आवश्यक दुरुस्ती करून घ्यावी, असे आवाहन जनलोक प्रतिष्ठान सामाजिक संघटना, पुणे यांच्या वतीने करण्यात आले आहे.