ईश्वरपूर पोलिसांची धडाकेबाज कारवाई : कर्णकर्कश सायलेन्सर जप्त करून केले नष्ट

ईश्वरपूर शहरातील वाढत्या ध्वनीप्रदूषणाला आळा घालण्यासाठी इस्लामपूर पोलीस प्रशासनाने कर्णकर्कश आवाज करणाऱ्या व अवैध बदल केलेल्या मोटरसायकल सायलेन्सरविरोधात विशेष मोहीम राबवत धडक कारवाई केली. नागरिकांकडून येणाऱ्या तक्रारींची गंभीर दखल घेत ही मोहीम हाती घेण्यात आली.
या कारवाईदरम्यान मोठ्या आवाजाचे सायलेन्सर असलेल्या अनेक मोटरसायकलींवर कारवाई करण्यात आली. जप्त करण्यात आलेले अवैध सायलेन्सर पोलिसांनी नष्ट केले असून, या मोहिमेमुळे शहरातील ध्वनीप्रदूषण कमी करण्यास मोठी मदत होणार असल्याचे सांगण्यात आले.
सदर मोहीम उपविभागीय पोलीस अधिकारी अरुण पाटील यांच्या मार्गदर्शनाखाली पार पडली. यावेळी सहाय्यक पोलीस निरीक्षक अल्पेश लावंड, ग्रेड पीएसआय मोहिते तसेच पोलीस कर्मचारी यादव, शरद बावडेकर, सलमान मुलानी, सचिन मोरे, निलेश पुणे आणि रवींद्र बनसोडे यांनी सक्रिय सहभाग घेतला.
पोलीस प्रशासनाने नागरिकांना वाहनांमध्ये अवैध बदल न करण्याचे आणि वाहतूक नियमांचे पालन करण्याचे आवाहन केले आहे. अन्यथा अशा प्रकारची कठोर कारवाई पुढेही सातत्याने सुरू राहणार असल्याचा इशाराही देण्यात आला आहे.