केंद्रीय शिक्षण मंत्री धर्मेंद्र प्रधान यांची हकालपट्टी करा - एसएफआय

छत्रपती संभाजीनगर, दि. ६ जून — केंद्र सरकारच्या शिक्षण क्षेत्रातील अपयशी धोरणांविरोधात आणि राष्ट्रीय परीक्षा व्यवस्थेतील वाढत्या गोंधळाच्या निषेधार्थ स्टुडंट्स फेडरेशन ऑफ इंडिया (एसएफआय) च्या वतीने आज सायंकाळी डॉ. बाबासाहेब आंबेडकर मराठवाडा विद्यापीठाच्या मुख्य प्रवेशद्वारासमोर निदर्शने करण्यात आली.

यावेळी एसएफआयने केंद्रीय शिक्षणमंत्री धर्मेंद्र प्रधान यांच्या राजीनाम्याची मागणी करत "शिक्षणमंत्री धर्मेंद्र प्रधान यांची हकालपट्टी करा" अशी घोषणा दिली. तसेच नॅशनल टेस्टिंग एजन्सी (NTA) बरखास्त करण्याची मागणीही करण्यात आली.

एसएफआयच्या चे अरुण मते म्हटले की, NTA च्या अकार्यक्षम कारभारामुळे देशभरातील लाखो विद्यार्थ्यांचे शैक्षणिक नुकसान होत आहे. NEET परीक्षेतील पेपरफुटी, UGC-NET अर्ज प्रक्रियेतील गैरव्यवस्थापन, CBSE परीक्षांच्या मूल्यमापनातील त्रुटी तसेच CUET-UG परीक्षा ऐनवेळी रद्द होण्याच्या घटनांमुळे विद्यार्थ्यांमध्ये तीव्र असंतोष निर्माण झाला आहे.

या सर्व घटनांची जबाबदार म्हणून केंद्रीय शिक्षणमंत्री धर्मेंद्र प्रधान यांची हकल्लपट्टी केली पाहिजे अशी मागणी एसएफआयने केली. तसेच देशभरात सुरू असलेल्या विशाल स्वाक्षरी मोहिमेचा आणि जनआंदोलनाचा भाग म्हणून ही निदर्शने आयोजित करण्यात आल्याचे एसएफआय जिल्हा सचिव मनिषा बल्लाळ यांनी सांगितले.

यावेळी विद्यार्थ्यांनी केंद्र सरकारच्या शिक्षणविरोधी धोरणांचा निषेध करत विविध घोषणाबाजी केली. शिक्षण व्यवस्थेतील गोंधळ थांबवून विद्यार्थ्यांना न्याय देण्यात यावा, अन्यथा आंदोलन अधिक तीव्र करण्यात येईल, असा इशाराही एसएफआयने दिला.

या प्रसंगी डॉ. लोकेश कांबळे, एसएफआय चे जिल्हा अध्यक्ष सुरज देवकर, आशितोष, शितल चोपडे, जीवन मोरे, संजीवनी ठोंबरे, प्रतिक बोरडे, नम्रता जवरे, प्रतिक्षा लांडगे, विश्वजित गिरी, पांडुरंग मगर, उतरा जाधव व विविध विभागांतील विद्यार्थी उपस्थित होते.